सरकारले ६३ जिल्लाका सबै विद्यालयको अवस्थाबारे अध्ययन गर्ने भएको छ । भूकम्पले क्षति पुर्याएका १४ जिल्लाबाहेक सबै जिल्लाका विद्यालयको अवस्थाबारे अध्ययन गर्न लागेको हो ।
केन्द्रीय आयोजना कार्यान्वयन एकाइ (शिक्षा) ले आगामी वर्ष विद्यालय भवनको अवस्था अध्ययन गर्न लागेको हो । विश्व बैंको सहयोगमा ६३ जिल्लाका विद्यालय भवनको अनुगमन गरी त्यसको अवस्थाबारे जानकारी दिन लागिएको एकाइ प्रमुख इमनारायण श्रेष्ठले जानकारी दिए ।
‘कति भवन ढुंगामाटोले बनेका होलान्, कतिपय भवनको अवस्था अत्यन्तै नाजुक भएका होलान्, सबै विषयमा अध्ययन गरी सरकारलाई प्रतिवेदन बुझाउनेछौं’– उनले भनेको खबर शनिबारको नेपाल समाचारपत्र दैनिकमा प्रकाशित छ ।
काठमाडौं महानगरपालिकाभित्र सञ्चालन हुने संस्थागत र सामुदायिक विद्यालयले १४ प्रकारका सेवा शुल्क तिर्नुपर्ने भएको छ । सामुदायिक विद्यालयले २ र संस्थागत विद्यालयले १२ प्रकारका कर तिनुपर्ने भएको छ ।
महानगरपालिकाको नगरसभाले सेवा शुल्क लिने निर्णय गरेसँगै नयाँ शुल्क लागू हुने भएको हो । नाम परिवर्तन गर्न माध्यमिक तहको संस्थागत विद्यालयको ५० हजार र आधारभूत तहको संस्थागत विद्यालयको ३० हजार, अनुमतिपत्र वितरण गर्न आधारभूत तहको संस्थागत विद्यालयको ५ हजार र मावि तहको संस्थागत विद्यालयको १० हजार, विद्यालयको स्वामित्व परिवर्तन गर्न आधारभूत तहको २० हजार र माध्यमिक तहको ३० हजार, स्थान परिवर्तन गर्न आधारभूत तहको २० हजार र माध्यमिक तहको ३० हजार रुपैयाँ लिने निर्णय नगरसभाले गरेको छ ।
संस्थागत विद्यालयको विद्यालय व्यवस्थापन समितिको अध्यक्ष मनोनयन गर्न १ हजार, विद्यार्थीको नामथर, जन्ममिति सच्याई प्रतिलिपि लिन प्रतिविद्यार्थी २ सय तथा संस्थागत विद्यालयको विद्यार्थी भेरिफिकेसन गर्न ५ सय रुपियाँ लिने निर्णय गरेको छ ।
त्यसैगरी नगरसभाले करार तथा राहत शिक्षक नियुक्तिको अभिलेखीकरण गर्न आधारभूत तहको सामुदायिक विद्यालयमा १ हजार र मावि तहमा २ हजार रुपियाँ लिने निर्णय गरेको छ । विद्यालय शिक्षाको जिम्मेवारी स्थानीय तहमा गइसकेपछि नयाँ सेवा शुल्क कायम गरिएको कामपाका प्रवक्ता ज्ञानेन्द्र कार्कीले बताएको खबर बुधबारको नेपाल समाचारपत्र दैनिकमा प्रकाशित छ ।
मन्थली नगरपालिका– ६, नवुघाटस्थित पञ्चकन्या आधारभूत विद्यालयमा कक्षा, शिक्षक र विद्यार्थी संख्या बराबर छ । ३ कक्षासम्म पढाइ हुने यो विद्यालयमा शिक्षक र विद्यार्थी पनि तीन–तीन जना नै छन् ।
‘पढाउँदा रमाइलो हुन्छ,’ प्रधानाध्यापक सुन्दर बस्नेतले भने– ‘कक्षा कोठामा पस्दा एक शिक्षक र एकै विद्यार्थी हुन्छन् । कहिलेकाहीं त एकै ठाउँमा राखेर समेत पढाउछौं ।’
यस विद्यालयमा विद्यार्थी धेरै हुँदा ३४–३५ जनासम्म पुगेको तथ्यांक छ । यसरी विद्यार्थी घटेको यो पहिलो पटक हो । नवुघाटमा माझी समुदायको बसोबास छ, यहाँ २८ घरपरिवार माझी बस्दै आएका छन् ।
शिक्षिका सुधा माझीले भनिन्– ‘पोहोर ७ जना थिए, अहिले घटेर ३ जना भए, अर्को साल त घटेर एक जना पनि भर्ना हुने अवस्था छैन । गाउँमा विद्यालय आउने उमेरका बच्चा नै छैनन् ।’
सामुदायिक विद्यालयको लाजमर्दो अवस्थाबारेको यो खबर सोमबारको कान्तिपुर दैनिकमा प्रकाशित छ ।
केही दिनअघि सार्वजनिक भएको ०७४ को माध्यमिक शिक्षा परीक्षा (एसईई) को नतिजामा परीक्षा नियन्त्रण कार्यालय (पनिका) को असावधानी देखिएको छ ।
शिक्षा मन्त्रालयले गठन गरेको छानबिन समितिले आइतबार शिक्षामन्त्री गिरिराजमणि पोखरेललाई बुझाएको प्रतिवेदनमा असावधानी र प्राविधिक त्रुटिका कारण दुई दिन फरक–फरक नतिजा आएको ठहर गरेको छ ।नतिजामा त्रुटि भएको ठहरपछि परीक्षा नियन्त्रक अम्बिकाप्रसाद रेग्मी शिक्षा मन्त्रालय तानिएका छन् ।
असावधानी र प्राविधिक त्रुटि देखिएको प्रतिवेदन छानबिन समितिले शिक्षामन्त्रीलाई बुझाएपछि रेग्मी मन्त्रालय तानिएका हुन् । रेग्मीले सम्हालेको उक्त जिम्मेवारीमा पाठ्यक्रम विकास केन्द्रका कार्यकारी निर्देशक कृष्णप्रसाद काप्रीलाई अर्को व्यवस्था नहुञ्जेलसम्मका लागि तोकिएको खबर सोमबारको नयाँ पत्रिका दैनिकमा प्रकाशित छ ।
शिक्षालाई निजीकरण, व्यापारीकरण र माफियाकरण गर्न सरकारले सघाएको भन्दै विद्यार्थीहरूले त्यसको विरोध गरेका छन् ।
संयुक्त विद्यार्थी संगठनको आह्वानमा आइतबार राजधानीको प्रदर्शनीमार्गस्थित आरआर क्याम्पस अगाडि सडकमै विद्यार्थी र टिचिङ बोर्ड राखेर पढाउँदै विरोध जनाएका छन् ।
विद्यार्थी नेता विवेक राईले सार्वजनिक शिक्षाको स्तरोन्नति गर्न ध्यान दिनुको सट्टा शिक्षामा निजीकरण गर्न सरकार नै उद्धत रहेको भन्दै सडकमै कक्षा लिएर विरोध गरिएको बताए ।
सुनसरी कोशी गाउँपालिका– ७, हरिपुरका १७ वर्षीय गौतम पाठक आफ्नै विद्यालयका प्रधानाध्यापकको कुटाइबाट घाइते भएका छन् ।
साथी–साथीबीच भनाभनको विषयलाई लिएर आइतबार मध्याह्न सुनसरी सदरमुकाम इनरुवा नगरपालिका– ४ स्थित प्रिसियस एकेडेमीका प्रधानाध्यापक ओमप्रकाश यादवसहितका शिक्षकले रबरको पाइपले आफ्नै विद्यालयका कक्षा १० मा अध्ययनरत विद्यार्थी पाठकलाई निर्घात कुटपिट गरेको पीडित पाठकले बताएका छन् ।
पीडित पाठकले आफूलाई कोठामा थुनेर प्रधानाध्यापक सर ओमप्रकाश यादव, चालक कमल दास, चन्दन यादव र नन्दकिशोर यादवसहितले लाठी र रबरको पाइपले कुटपिट गरेको बताए । कुटपिटबाट पाठकको कानबाट रगत निस्केको छ भने शरीरभरि नै निलडाम रहेको पीडितका ठूलो बुबा श्यामानन्द पाठकले बताए । घाइते पाठकको स्थानीय क्लिनिकमा उपचार भइरहेको छ ।
उनले आफूलाई अपांग बनाई दिने, पढ्ने सपना चकनाचुर पारिदिने भन्दै पालोपालो गरी प्रधानाध्यापक ओमप्रकाश र शिक्षकले निर्घात कुटपिट गरेको आरोप लगाए । पीडित पाठकले कुटपिट गर्ने शिक्षकलाई कारबाही गर्नुपर्ने माग गरेका छन् ।
उता प्रधानाध्यापक यादवले कुटपिट गरेको स्वीकार गर्दै अपांग बनाउने गरी नकुटेको दाबी गरे। यादवले आबेगमा आएर कुटपिट गरेको भनी स्वीकारे। यो घटना मिलाउने प्रयासमा समेत रहेको यादवले बताए । रासस
माध्यमिक शिक्षा परीक्षा (एसईई) को नतिजा प्रकाशनमा गम्भीर त्रुटि देखिएको छ । परीक्षा नियन्त्रण कार्यालय (पनिका) ले शनिबार प्रकाशित गरेको नतिजामा आइतबार हजारौं विद्यार्थीको जीपीए बढेको छ ।
पनिकाले तोकेका वेबसाइट तथा एसएमएसबाट विद्यार्थीले शनिबार प्राप्त गरेको जीपीए आइतबार बढेको हो । जीपीए बढेपछि विद्यार्थी, अभिभावक र शिक्षक अन्योलमा परेका छन् । कुनै पनि विषयमा ९० अंक ल्याउने विद्यार्थीको ग्रेड सम्बन्धित विषयमा ए प्लस हुनु पर्नेमा पनिकाको सिस्टमले ए ग्रेड मात्रै देखाएको थियो ।
बढ्यो अधिकांशको जीपीए
आइतबार प्रायः विद्यार्थीको जीपीए बढेको छ । आफ्नो विद्यालयका लगभग सबै विद्यार्थीको जीपीए बढेको सुकेधारास्थित बागमती बोर्डिङ माध्यमिक विद्यालयका प्रिन्सिपल श्यामदत्त अधिकारीले बताए । ‘केही साँच्चै राम्रा विद्यार्थीको अप्रत्याशित नतिजाले हामी आश्चर्यमा परेका थियौं’ उनले भने– ‘शनिबार जीपीए ३.८ आउनेको आइतबार ३.९ आएको छ ।’
कपनस्थित रिलायन्स इन्टरनेसनल एकेडेमीका प्रिन्सिपल खेमलाल भुसालले पनि आइतबारको नतिजा तुलनात्मक रूपले सही देखिएको बताउँदै यसबाट थोरै भए पनि विद्यार्थीहरूमा न्याय भएको बताए ।
जिम्मेवार निकायबाट धेरै लापरबाही हुँदा विद्यार्थीको मनोविज्ञानमा नकारात्मक असर परेको अधिकारीले बताएको खबर सोमबारको नयाँपत्रिका दैनिकमा प्रकाशित छ ।
राष्ट्रिय परीक्षा बोर्ड मातहतको परीक्षा नियन्त्रण कार्यालयले हिजो सार्वजनिक गरेको माध्यमिक शिक्षा परीक्षा कक्षा १० को परीक्षाफलमा विद्यार्थीको प्राक्टिकल प्राप्तांक नै नजोडी सार्वजनिक भएको पाइएको छ ।
परीक्षाफल सार्वजनिक भएपछि विद्यार्थीले आधिकारिक वेबसाइट र नेपाल टेलिकमको १६१६ डायल नम्बरबाट शनिबार विद्यार्थीले पाएको ग्रेड पोइन्ट एभरेज (स्तरीकृत अंक) भन्दा आइतबार ग्रेड पोइन्ट एभरेज भटाभट बढ्न थालेपछि उक्त प्राविधिक त्रुटि पत्ता लागेको हो ।
परीक्षा नियन्त्रण कार्यालयले पर्याप्त, तयारी, रुजु र पुनरावलोकन नगरी परीक्षाफल प्रकाशित गर्दा प्राविधिक गडबडी भएको पाइएको हो तर कार्यालयले कूल विद्यार्थीको नतिजा के कति बढोत्तरी भयो भन्ने नयाँ तथ्यांक सार्वजनिक गरेको छैन । यसबारे थप अध्ययन र छानबिन हुने देखिएको छ ।
प्राविधिक कमजोरीबारे पनिका कार्यालयका अधिकारी र कर्मचारीले पछिल्लोमा जुन अंक देखिन्छ, त्यही आधिकारिक र सक्कली हो भन्न थालेका छन् । पछिल्लो ग्रेडसिट अनुसार सबै ग्रेडमा विद्यार्थीको स्तर सामान्य वृद्धि भएको बुझिएको छ ।
नयाँ स्थितिमा शनिबार सार्वजनिक गरिएको तथ्यांक नै हेरफेर हुने देखिएको छ । ए ग्रेड आउनेको ए प्लस, बी प्लस आउनेको ए ग्रेडसम्ममा हेरफेर भएको ठानिएको छ । यसबारे बुझ्न खोज्दा परीक्षा नियन्त्रक अम्बिकाप्रसाद रेग्मीसँग सम्पर्क हुन सकेन ।
कतिपयले विद्यार्थीले परीक्षाफल आएलगत्तै आफूले सोचेजति ग्रेड नभएको चिन्ता आइतबार गरेका थिए भने सोमबार नयाँ विवरण आएपछि प्रशन्नता व्यक्त गरेका थिए । शिक्षा, विज्ञान तथा प्रविधि मन्त्रालयका सचिव खगराज बरालले नयाँ सफ्टवेयरमा प्राप्तांकलाई जोड्ने सूत्र हाल्दा गल्ती भएको पाइएको र विस्तृत के भएको बुझ्न बाँकी रहेको बताए । उनले यसबारे आवश्यक अध्ययन भइरहेको बताए ।
परीक्षा उपनियन्त्रक गेहनाथ गौतमले पनि सफ्टवेयरले कमान्ड नगरेकाले शुरुमा केही कम ग्रेड आएको र पछिल्लो नजिताले विद्यार्थीलाई न्याय भएको दाबी गरे ।
राष्ट्रिय निजी तथा आवासीय विद्यालय एसोसिएसनका अध्यक्ष ऋतुराज सापकोटाले विद्यार्थीले नयाँ र सक्कलीस्तर सहितको पछिल्लो नतिजा पाएको हो भने उनीहरुका लागि राम्रो हो तर प्रणाली त्रुटिपूर्ण हुनु कार्यालयको कमजोरी भएको बताए । उनले भने– “बरु एक दिन ढिलो गरेको भए हुन्थ्यो, यसरी त्रुटिपूर्ण विवरण सार्वजनिक हुनु गलत हो ।” रासस
यस वर्षको माध्यमिक शिक्षा परीक्षा (एसईई) को नतिजा सार्वजनिक भएको छ । गत चैतमा सञ्चालित परीक्षाको नतिजा परीक्षा नियन्त्रण कार्यालयले शनिबार साँझ प्रकाशित गरेको हो ।
नतिजा अनुसार जीपीए ३.६५ देखि ४ (ए प्लस ग्रेड) ल्याउने विद्यार्थीको संख्या १४ हजार २ सय ३४ जना छ । ३.२५ देखि ३.६० जीपीए (ए ग्रेड) ल्याउने विद्यार्थीको संख्या ४६ हजार १ सय ३० र जीपीए २.८५ देखि ३.२० (बी प्लस ग्रेड) ल्याउने विद्यार्थीको संख्या ४९ हजार ३७ छ ।
७० हजार ५ सय १२ विद्यार्थीले जीपीए २.४५ देखि २.८० (बी ग्रेड) ल्याएका छन् । जीपीए २.०५ देखि २.४० (सी प्लस ग्रेड) ल्याउने विद्यार्थी ६१ हजार ८ सय ७० र जीपीए १.६५ देखि २.०० (सी ग्रेड) ल्याउने विद्यार्थी १ लाख १ हजार ४३ छन् ।
जीपीए १.२५ देखि १.६० (डी प्लस ग्रेड) ल्याउनेको संख्या ३५ हजार ५ सय ८४ र जीपीए ०.८५ देखि १.२० (डी ग्रेड) ल्याउने विद्यार्थीको संख्या ५८ हजार ६ सय ८८ छ ।
एक्जाम्टेडतर्फ भने एक जना विद्यार्थीले पनि जीपीए ३.६५ देखि ४ (ए प्लस ग्रेड) ल्याउन नसकेको खबर आइतबारको नागरिक दैनिकमा प्रकाशित छ ।
०७४ को माध्यामिक शिक्षा परीक्षा (एसईई) को नतिजा आज (शनिबार) सार्वजनिक हुने भएको छ । चैतमा सञ्चालित परीक्षाको नतिजा सार्वजनिक गर्न परीक्षा नियन्त्रण कार्यालयले दिउँसो ३ बजे बैठक बोलाएको छ ।
सबै तयारी पूरा भएकाले दिउँसो नतिजा सार्वजनिक गर्न लागिएको जानकारी परीक्षा नियन्त्रक अम्बिकाप्रसाद रेग्मीले दिएका छन् ।
नतिजा प्रकाशित भएपछि न्युजकोसेली (www.newskoseli.com) मै रिजल्ट हेर्न सकिनेछ…
