यी हुन् ठूला दलका हिन्दूधर्म विरोध नेताहरू, कमल थापाले अकस्मात गरे एक–एकको पर्दाफास

 राष्ट्रिय प्रजातन्त्र पार्टीका अध्यक्ष कमल थापाले धर्मनिरपेक्षताका आडमा धर्मपरिवर्तनलाई प्रोत्साहन गर्ने नेताहरूलाई धार्मिक समारोहमा बहिष्कार गर्न आग्रह गरेका छन् ।

पत्रकारहरूसँग मंगलबार कुरा गर्दै अध्यक्ष थापाले नेपालमा हिन्दूधर्ममाथि आक्रमण गर्न क्रिश्चियनहरूबाट भइरहेको ज्यादतिलाई विभिन्न दलका नेताहरूले संरक्षण गरेको बताए ।

‘बिदेशी प्रभावमा षड्यन्त्रपूर्वक हिन्दुराष्ट्र हटाई धर्मनिरपेक्षता लाद्ने र धर्मनिरपेक्षको आडमा धर्मपरिवर्तनलाई प्रोत्साहन गर्ने दलका नेताहरूलाई धार्मिक समारोहमा बहिष्कार गर्ने साहस धार्मिक सांस्कृतिक क्षेत्रले नगरेसम्म सनातन धर्ममाथि आक्रमण भैरहनेछ’, उनले भनेका छन्, ‘यस्तै परम्परा कायम रहिरहने हो भने नेपाल कदापि हिन्दूराष्ट्र बन्दैन ।’

विशेष गरेर एमाले, माओवादी केन्द्र र नेपाली कांग्रेसका केही नेताहरूले क्रिश्चियनहरूलाई संरक्षण गरेको अध्यक्ष थापाको भनाइ थियो । उनले नेपाल र नेपालीहरूको अस्तित्व हिन्दूधर्मसँग जोडिएको बताए ।

नेपालका लागि राजसंस्था अपरिहार्य रहेको बताएका राप्रपाका अध्यक्ष थापाले भने, ‘राजसंस्था र हिन्दूराष्ट्र रहँदासम्म नेपालमा कसैले पनि आक्रमण गर्न सकेका थिएनन् । अहिले नेपालको राष्ट्रियता कमजोर हुँदै गएको छ ।’