प्रधानमन्त्री केपी शर्मा ओली र पुष्पकमल दाहाल प्रचण्ड मिलेर गत जेठ ३ गते तत्कालीन नेकपा एमाले र माओवादी केन्द् बीच एकिकरण गरी नेपाल कम्युनिस्ट पार्टी (नेकपा) पार्टी गठन गरेका थिए। दुवै पार्टीको एकिकरणपछि तल्लो तहको कमिटीलार्इ पनि एकिकरणको लागि निर्देशन दिएका थिए। सोही अनुसार प्रदेश ५ का १२ मध्ये ७ जिल्ला पूर्वएमाले र ५ जिल्लाको नेतृत्व पूर्वमाओवादीले पाउने सहमति ओली र प्रचण्डले गरेका थिए ।
तर प्रदेश ५ का जिल्ला कमिटीहरू चयनका क्रममा पूर्वएमालेभित्रै गुटबन्दीले विवाद उत्पन्न भएको छ। प्रदेश ५ मा सर्वसम्मतिको नाटक गरेपछि वरिष्ठ नेता माधवकुमार नेपाल समूहले विरोध जनाएको छ । पूर्वएमालेले दाङ र अर्घाखाँचीमा माधव नेपाल पक्षले असहमति जनाएको छ ।
प्रदेश ५ को कार्यदलले बिहीबार महासचिव बिष्णु पौडेललाई सर्वसम्मति भएको भन्दै प्रतिवेदन बुझाएको छन् । प्रदेश अध्यक्षमा पूर्वएमालेका दलबहादुर राना र पूर्वमाओवादीका गणेशमान पुनमध्ये एकलाई बनाउन प्रस्ताव गरिएको छ ।
पूर्वएमालेले पाएका जिल्ला अध्यक्ष चयनमा मापदण्ड नबनाइएको र यसअघिको गुटका आधारमा व्यवहार गरिएको वरिष्ठ नेता नेपाल पक्षको आरोप छ । नेपाल समूहले स्थायी कमिटी सदस्य समेत रहेका प्रदेश ५ का मुख्यमन्त्री शंकर पोखरेलले पूर्वाग्रह राखेर स्थान नदिएको आरोप लगाएको छ ।
दाङका अध्यक्ष पूर्वएमालेले पाउने सहमति थियो । तर पूर्वएमालेका अध्यक्ष टीकाराम खड्कालाई अध्यक्ष नदिएर शिव आचार्यलाई बनाइएको छ । खड्का नेपाल समूहका हुन् भने आचार्य ओली समूहका मानिन्छन् ।
मुख्यमन्त्री पोखरेलले अन्याय गरेर खड्कालाई हटाएर आचार्यलाई अध्यक्ष बनाउन प्रस्ताव गरेको आरोप नेपाल समूहको छ । दाङको अध्यक्षमा प्रस्तावित आचार्य मुख्यमन्त्री पोखरेलका बहिनी ज्वाइँ पनि हुन् ।
Credit : onlinepana.com