जासुसी कार्यालय बन्द गर्न नेकपा पूर्वी कमाण्डको चेतावनी, अटेरी गरे परिणाम गम्भीर (विज्ञप्तिसहित)

नेपाल कम्युनिस्ट पार्टीको पूर्वी कमाण्डले बाढी नियन्त्रणका नाम झुण्ड्याएर विराटनगरमा खडा गरिएको जासुसी कार्यालय तत्काल बन्द गर्न चेतावनी दिएको छ ।

नेकपाका पूर्वी कमान्ड इन्चार्ज विरहीले मंगलबार एक विज्ञप्ति जारी गर्दै २०६५ सालमा कोसी नदीको बाढी नियन्त्रण गर्न भन्दै विराटनगर १३ मा खडा गरिएको भारतीय कार्यालय तत्काल हटाउन चेतावनी दिएको हो ।

‘२०६५ सालमा कोसी नदीको बाढी नियन्त्रण गर्न बनाइएको विराटनगर १३ स्थित भारतीय बाढी नियन्त्रण कार्यालय अझै हटाइएको छैन र त्यसले नेपाल देश र क्रान्तिकारी आन्दोलनको विरुद्ध जासुसी गरिरहेको छ ।’ विज्ञप्तिमा भनिएको छ ‘उक्त भारतीय जासुसी कार्यालय हटाउन र हाम्रा नेताकार्यकर्ता रिहा गर्न माग गर्दछौँ । अन्यथा साम्राज्यवाद र उसको नेपाली दलाल सरकारका विरुद्ध थप सङ्घर्षमा उत्रन बाध्य हुनेछौँ ।’

नेकपाको बन्दका कारण पूर्वी नेपाल ठप्प, अवज्ञा गर्ने गाडीमा तोडफोड र आगजनी, ठाउँ-ठाउँमा बम

यस्तै विरहीले प्रचण्ड गठबन्धनको केपी ओली सरकारको सामाजिक दलाल पुँजीवादी प्रवृत्ति तथा राष्ट्रघाती, जनघाती र फासिस्ट चरित्रबिरुद्ध मंगलबार पूर्वी नेपाल बन्द गरेको बताएका छन् ।

उनले पूर्वी क्षेत्र बन्द गर्न सघाउने सबै पक्षलाई धन्यवाद दिँदै सरकारले बिनाकारण गिरफ्तार गरेका नेता र कार्यकर्तालाई बिनासर्त तत्काल रिहा गर्न आग्रह गरेका छन् ।

नेकपा केन्द्रीय सदस्य तथा कोसी ब्युरो इन्चार्ज किरण राईसहित उदयपुर, सुनसरी, मोरङ, धनकुटा, सङ्खुवासभा, तेह्रथुम, इलाम, झापालगायत स्थानबाट ५० औँ कार्यकर्तालाई गिरफ्तार गरेर झूट्टा मुद्दामा फसाइएको भन्दै नेकपा पूर्वी कमाण्डले मंगलबार बन्द आयोजना गरेको हो

ओली सरकारले शान्तिपूर्ण कार्यक्रम गर्न समेत रोक लगाएर धरपकड र गिरफ्तारी बढाएपछि नेकपा त्यसको बिरोधमा उत्रिएको छ भने चरणबद्धरुपमा आन्दोलनको घोषणा समेत गरेको छ । गिरफ्तार आफ्ना नेता कार्यकर्ता तत्काल रिहा गर्न नेकपाले चेतावनी दिएको छ ।

हेर्नुहोस् पूर्ण बिज्ञप्ति