पोखरा । सरकारले दमनको नीति अघि सारिरहेको अवस्थामा नेत्रविक्रम चन्द विप्लव नेतृत्वको नेपाल कम्युनिष्ट पार्टीले आफ्नो संगठन निर्माण, बिस्तार तथा जनसम्बन्ध सुदृढिकरण अभियानलाई तीब्रता दिईरहेको छ । यसैक्रममा कास्की जिल्लामा पनि नेकपाले विभिन्न भातृ संगठनहरुको जिल्ला सम्मेलन या भेला गरी नयाँ नेतृत्व चयन गरिहेको छ भने जनसम्बन्ध सुदृढिकरण अभियान अन्तरगत विभिन्न कार्यक्रम गरिहेको छ ।
संगठन निर्माण एवं बिस्तार अभियान अन्तरगत नेकपा कास्कीको भातृ संगठन अखिल नेपाल भूमिहीन सुकुम्बासी संघ कास्कीको जिल्ला भेला मंगलबार पोखरामा सम्पन्न भयो । भेलाले टीकाराम घिमिरेको अध्यक्षतामा १९ सदस्यीय नयाँ कार्य समिति चयन गरेको छ । सो नयाँ कार्य समितिमा कमल खड्का उपाध्यक्ष र दिलबहादुर सुनार सचिव रहेका छन् ।
उक्त भेलाको उद्घाटन गर्दै नेपाल कम्युनिष्ट पार्टीका गण्डक ब्युरो सदस्य एवं कास्की जिल्ला सेक्रेटरी रुपेशले विभिन्न राजनीतिक पार्टीहरुले संसदीय चुनाव जित्न सुकुम्बासीहरुलाई प्रयोग गरेपनि चुनाव जितेपछि सुकुमबासीहरुको समस्या समाधान गर्न वेवास्ता गर्ने गरेको आरोप लगाए । उनले संसदीय राजनीतिमा लागेका राजनीतिक पार्टीका नेता तथा कार्यकर्ताहरुले गरीब, किसान, मजदूर र सुकुम्बासीहरुको समस्या समाधान गर्नै नसक्ने तर्क राखे । उनले गरीब, किसान, मजदूर, सुकुम्बासी लगायत सर्वहारावर्गको मुक्तिका लागि आफूहरु बलिदानी दिन तयार रहेको बताउँदै वर्गीय मुक्तिका लागि संघर्ष उत्रिन सबैलाई आग्रह गरे ।
आफ्नो पार्टीको नाममा जग्गा दिलाईदिने, न्याय दिलाईदिने लगायत विभिन्न प्रलोभन दिएर विभिन्न स्थानमा विभिन्न व्यक्तिहरुले रकम उठाईरहेको जानकारी आईरहेको उल्लेख गर्दै उनले पार्टीको नाममा हुने ठगीबाट बच्न सचेत रहन भूमिहीन, सुकुम्बासीहरुलाई सचेत गराए ।
नेपाल कम्युनिष्ट पार्टी गण्डक ब्यूरोका सदस्यहरु जगन तिवारी, गोकुल पराजुली, सुजन विक, अखिल –क्रान्तिकारी)का केन्द्रीय सदस्य मिलन राई, अनेमसंघ –क्रान्तिकारी)की केन्द्रीय सदस्य प्राप्ति विक लगायतका वक्ताहरुले आफ्नो हक र अधिकार प्राप्तिका लागि सम्पूर्ण भूमिहीन सुकुम्बासीहरु कसैको प्रलोभनमा नपरी एकजुट भएर लड्नुपर्ने कुरामा जोड दिएका थिए ।
Credit : janasanchar.com