नेकपा एमालेले पार्टी एकता गर्दा बराबरीको सिद्धान्तमा अडान लिएर माओवादी केन्द्रले पार्टी विभाजको रेखा कोर्न खोजेको आशंका गरेको छ । एमालेले माओवादीलाई केन्द्रीय कमिटीमा ४० प्रतिशतभन्दा केही कम संख्यामा नआए एकता धकेलिन सक्ने चेतावनी पनि दिएको छ ।
एमाले अध्यक्ष केपी शर्मा ओलीसँग झण्डै तीन घण्टा भएको छलफलपछि सोमबार राति अबेरसम्म बसेको स्थायी कमिटी बैठकमा बराबरी हैसियत स्वीकार्न नसकिने नेताहरुले बताए ।
बैठकमा अध्यक्ष ओलीले माओवादीले ५०/५० को हैसियत मागेको ब्रिफिङ गरेका थिए । ‘आधा भाग मागेर ४० प्रतिशत लिनेजस्तो बुझिन्छ,’ ओलीको भनाइ उद्धृत गर्दै एक स्थायी कमिटी सदस्य भन्छन्, ‘नियतमा खोट जस्तो बुझें ।’
संवैधानिक व्यवस्थाअनुसार पार्टी विभाजन गर्न अब संसदीय दलमा ४० प्रतिशत पुर्याएर मात्रै पनि हुँदैन्, पार्टी केन्द्रीय कमिटीमा पनि ४० प्रतिशत सदस्यको समर्थन चाहिन्छ ।
हाल २ सय ९९ सदस्यीय केन्द्रीय समिति प्रस्ताव गरिएको छ । एमालेले आफ्नो पार्टीका २ सय र माओवादी केन्द्रबाट ९९ सदस्य रहने प्रस्ताव गरेको छ । विराटनगर सम्मेलनले माओवादीको ९९ सदस्यीय केन्द्रीय समिति बनाएको थियो । एमालेबाट भने १ सय ८४ सदस्य निर्वाचित र केही मनोनीतसहित २ सय रहनेछन् ।
सचिव भीम आचार्यले एकतामा एमालेको प्रतिबद्धता कायमै रहेको बताए । दुई पार्टीले गठन गरेका संगठन र वैचारिक कार्यदलले प्रतिवेदन दिइसकेको र नेपाल कम्युनिष्ट पार्टी स्थापना दिवस ९ वैशाखमा एकता गर्न सुझाइएको जानकारी दिए ।
स्थायी कमिटी सदस्य सुवास नेम्वाङले एकताका लागि गर्नुपर्ने आन्तरिक तयारी पूरा गरेर ढिलो नगरी अधिकतम सहमति गरी एकता घोषणा गर्नुपर्नेमा एमाले एकमत भएको बताए ।
एमाले र माओवादी केन्द्रबीच साँघुरिएका विवादहरु पुनः बल्झिन थालेका छन् । अहिले पार्टी एकतासँगै सरकार सञ्चालनको कार्यशैलि पनि थपिएपछि एकतामा उल्झन देखिएको छ ।
माओवादी केन्द्रले एकतापछि दुवै अध्यक्षको भूमिकामात्र होइन महाधिवेशनपछिको नेतृत्वबारे पनि एमालेको धारणा मागेको छ । चुनाव चिन्हमा देखिएको विवाद भने नतन्काउने समझदारी भएको छ ।
मिल्न बाँकी विषयलाई टुङ्गो लगाउन दुई अध्यक्षहरुलाई जिम्मेवारी दिइएकोमा निर्वाचन चिह्नको विषयमा विवाद नभएको एमाले महासचिव ईश्वर पोखरेलले जानकारी दिए । एमालेले सूर्य र केन्द्रले ‘सूर्यभित्र हँसिया हथौडा’ चिह्न राख्नुपर्ने अडान राखेको थियो । पोखरेलले चुनाव चिन्हको विवाद भने मिलेको बताए । ‘निर्वाचन चिह्न त विवादको विषय नै होइन, मिलिसक्यो,’ उनले भने ।
Credit : onlinepana.com