जब स्थानीयवासीले आ–आफ्नै घर भत्काइदिए…

सडक विस्तारका लागि धेरै ठाउँमा बल प्रयोग गरेर संरचना हटाउनु परेको अवस्थामा जलजला गाउँपालिका– ७, मिलनचोकका बासिन्दाले भने आ–आफ्ना घर आफैं भत्काएर सडक फराकिलो बनाएका छन् ।

मिलनचोकदेखि लेकफाँट र शालिजा जोड्ने सडक स्तरोन्नति योजना कार्यान्वयनका लागि सडक छेउछाउका ११ घर पूर्ण र करिव ६० घर आंशिक रूपमा भत्काएर सडक फराकिलो बनाउन सहयोग गरिएको स्थानीयवासी रामकृष्ण आचार्यले बताए । साढे २ मिटर मात्र चौडाइ रहेको साँघुरो सडकलाई संरचना हटाएर ८ मिटरको फराकिलो बनाइएको छ ।

पहिले दुईतर्फबाट गाडी आउँदा जाम हुने सडक अहिले सहज रूपमा दुईतर्फी सवारी आवतजावत गर्न सक्ने र धुलो पनि नउड्ने भएको स्थानीयवासी बाबुराम कार्कीले बताए । सडक ढलान र नाली बनाउन ५–५ दिनका दरले श्रमदान समेत गरिएको उनले बताए । सडकको दुवैतर्फ नाली बनाइएको छ । ७० प्रतिशतभन्दा बढी काम सकिएको छ । सडक फराकिलो बनाइएपछि मिलनचोकको सुन्दरता नै फेरिएको छ ।

गाउँपालिकाले २० लाख रूपैयाँ विनियोजन गरेको २ सय मिटर लामो सडक ढलान गर्ने र नाली बनाउने योजना पूरा गर्न आर्थिक सङ्कलनको तयारी भएको स्थानीयवासी देवबहादुर पुनको भनाइ छ । उपभोक्ताले २ लाख ३७ हजार ७ सय ८० रूपैयाँ बराबरको श्रमदान गर्नुपर्ने लागत अनुमानमा उल्लेख छ ।

२०७५ असोज ५ मा सम्झौता भएको योजना उपभोक्ताको सहयोग र सक्रियताका कारण लक्ष्यअघि नै सकिने उपभोक्ता समितिका अध्यक्ष लालवीर पुनले बताए । २०७६ वैशाख १५ भित्र योजना सम्पन्न गर्ने सम्झौता गाउँपालिकासँग भएको छ ।

जनसहभागिता र समुदायको सहयोगका कारण मिलनचोकको सडक ढलान योजना नमूना र उदाहरणीय भएको वडाध्यक्ष टुङ्गनाथ शर्माले बताए । फराकिलो बनाउने तथा नाली र ढलान गर्ने काम सकिएपछि यो सडकलाई ‘न्युरोड’ नामकरण गर्ने मिलनचोकवासीको तयारी रहेको राससले जनाएको छ ।

Credit : newskoseli.com

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.